3 milionë franga kompensim emergjent për ish fëmijët robër

Kanë përfituar 400 persona, mjete në vëllimin prej rreth tre milionë frangash. Mesatarisht janë dhënë nga 8000 franga për person në emër të kompensimit

Fëmijët e mbajtur në kushte shfrytëzimi gjatë shekullit të kaluar, një fenomen ky në Zvicër i njohur si “Verdingkinder”, ka kohë që bëjnë kërkesa për të marrë dëmshpërblim nga shteti.

Së fundi, një komitet që përfaqëson interesat e tyre ka nisur edhe një iniciativë për referendum në nivel nacional në këtë drejtim.

Por, para se të mbahet referendumi, disa nga personat “verdingkinder” kanë marrë një pjesë të kompensimit në formë të ndihmës emergjente. Kjo është bërë e mundur nga donacionet e njerëzve vullnetmirë, përmes të cilave në një fond janë grumbulluar një shumë të hollash.

Kështu ka deklaruar sot zëvendësdrejtori i Zyrës Federale të Drejtësisë Luzius Maeder para medieve. Kantonet kanë marrë pjesë po ashtu me rreth pesë milionë në këtë fond, ku priten edhe dy deri tre milionë franga të donacioneve të tjera.

Deri tash kanë përfituar 400 persona, mjete në vëllimin prej rreth tre milionë frangave. Ndërsa nga qershori i vitit 2014 në komisionin për fondin e ndihmës emergjente janë bërë 650 kërkesa prej të cilave janë shqyrtuar 450. Marrë mesatarisht janë dhënë nga 8000 franga për person në emër të kompensimit.

Deri në vitet 60 të shekullit 20 në Zvicër, me vendim të shtetit, mijëra fëmijë të familjeve problematike u janë dorëzuar familjeve fshatare për përkujdesje. Në shumë raste fëmijët e përmendur janë shfrytëzuar në mënyrë të paskrupullt për punë bujqësore dhe janë keqtrajtuar.