3 firma kosovare ekspozojnë në “Swissbau”, panairi më i madh i ndërtimit në Evropë

"Swissbau" është një ngjarje e madhe dhe e rëndësishme në industrinë zvicerane të ndërtimit

Nga 12 deri më 16 janar „Swissbau“ hap dyret në Bazel.

Panairi  „Swissbau“, sipas organizatorëve, është një nga më të mëdhenjtë e këtij lloji në Evropë.

Priten të vijnë mbi 100 mijë persona për të parë produktet më të reja të ekspozuara në 140 000 metra katrorë, në katër salla, me rreth 1100 pjesëmarrës.

Në mesin e tyre do të ekspozojnë edhe 3 firma nga Kosova: ELNOR, LESNA dhe SHEHU.

Pjesëmarrja e tyre është bërë e mundur me financimin e Zyrës Zvicerane përmes „Swisscontactit“,  projektit PPSE dhe me bashkëfinancim nga USAID-i të projektit „EMPOWER“.

Këto firma do të jenë të ekspozuara me shoqatën e përpunuesve të drurit në Kosovë, të përfaqësuara nga Arieta Vula Pozhegu.

Këto tri kompani do t’i ekspozojnë produktet e tyre të ndryshme, duke ofruar kualitet dhe dizajne moderne.

Firmat kosovare do të jenë prezente me pronarët e tyre dhe pritet që ata të bëjnë lidhje të reja biznesi me kompani zvicerane dhe të huaja.