12 neonazistë, në karnaval me kostumet e “Ku-Klux-Klan”

Ata kanë parakaluar duke mbajtur flakadanë dhe kanë pozuar para ndërtesës së Komunës me kostumet e tyre të bardha dhe kanë bërë përshëndetje hitleriane

Një grup pjesëmarrësish në karnavalet tradiconale, ka parakaluar të hënën rrugëve të qytetit Schwyz me kostume të grupit famëkeq ekstremist amerikan “Ku-Klux-Klan”, shkruajnë mediet zvicerane. Policia ka konstatuar se bëhet fjalë për një grup prej 12 neonazistësh, transmeton albinfo.ch.

Ata kanë parakaluar duke mbajtur flakadanë dhe kanë pozuar para ndërtesës së Komunës me kostumet e tyre të bardha dhe kanë bërë përshëndetje hitleriane.

“Ata nuk janë karnavalistë të zakonshën, por njerëz nga skena e të djathtës radikale. Bëhet fjalë për njerëz neonazistë, të gatshëm për ushtrim dhune”, thonë njohësit e zhvillimeve në regjion.

Policia ndërkaq është njoftuar rreth incidentit dhe ka marrë masat e nevojshme. “Ne tashmë kemi marrë në pyetje personat pjesëmarrës. Para se ta bëjmë përcaktimin juridik të veprës, ne duhet t`i kemi deklarimet e pjesëmarrësve”, ka thënë një zëdhënës policie.

Organizata raciste Ku-Klux-Klan është themeluar në vitin 1865 në Tennessee të SHBA-së. Ajo, përmes vrasjeve të afroamerikanëve dhe atentateve mbi politikanë, ka luftuar kundër ndalimit me ligj të skllavërisë në SHBA.

---