​Raporti i autopsisë: Ivanoviq u vra me revole “Zastava” prodhim serb

“Ka gjashtë plumba, katër plumba kanë dalë nga trupi, dy kanë mbetur në trup, lëndimet janë në zonën e pjesës së kraharorit dhe të gjoksit”, ka thënë Milan Ivanoviq, drejtor i Spitalit në Mitrovicën e veriut

Mjekësia ligjore e përbërë nga mjek shqiptarë dhe serbë kanë përfunduar autopsinë në trupin e pajetë të Oliver Ivanoviqit, politikanit serb që u vra sot në Mitrovicën e veriut. Në raportin fillestar të autopsisë bëhet e ditur se ai u qëllua për vdekje me gjashtë plumba, nga një revole e tipit “Zastava M70A”, prodhim serb, e njohur si “nëntëshe e gjatë”.

Më kërkesë të familjes, obduksioni është kryer në Qendrën Klinike Spitalore të Mitrovicës, i cili proces është udhëhequr nga mjekët e Institutit Ligjor të Kosovës, ku kanë marrë pjesë edhe mjekët serbë.

“Ka gjashtë plumba, katër plumba kanë dalë nga trupi, dy kanë mbetur në trup, lëndimet janë në zonën e pjesës së kraharorit dhe të gjoksit”, ka bërë të ditur për mediat serbe Milan Ivanoviq, drejtor i Qendrës Klinike dhe Spitalore në Mitrovicë. Sipas tij, autopsia zgjati rreth katër orë dhe viktima ishte plagosur në organet vitale, aorta e sipërme, vena dhe mëlçi, raporton kosovapres.

Ivanoviq është vrarë para selisë së partisë së tij në rrugën “Sutjeska” në veri të Mitrovicës nga persona deri tani të panjohur. Nuk dihen motivet dhe as nuk ka të dyshuar për vrasjen e tij, ndërsa e  vetmja provë është një veturë e djegur e tipit “Opel Astra”, e cila është gjetur pas vrasjes në një lagje në veri, për të cilën policia e Kosovës thotë se ka informacione për pronësinë e tij.

Vrasja e Ivanoviqit ka ngjallë reagime gjithandej opinionit kosovar, rajonal por edhe ndërkombëtarë. Të gjitha kancelaritë e botës po kërkojnë që rasti të zbardhet, ndërsa kjo vrasje të mos merret si shkas i përkeqësimit të raporteve ndëretnike në Kosovë. Vetë Ivanoviq, katër ditë më parë, shprehu rrezikun, nga siç tha ai, bandat serbe që po funksionojnë në veriun e Mitrovicës.