​Rënie 31% e kërkesave për azil në BE

Kjo ulje e konsiderueshme prej 31 për qind reflekton impaktin e pandemisë së COVID-19 dhe masat e urgjencës, të tilla si kufizimet e qarkullimit”

Kërkesat për azil në BE kanë shënuar një rënie prej 31 për qind në vitin 2020, duke arritur nivelin më të ulët që prej 2013, kryesisht për shkak të kufizimeve të qarkullimit lidhur me pandeminë, ka bërë të ditur sot Zyra evropiane e Azilit (EASO).

Sipas të dhënave nga kjo agjenci, që mbështetet në 27 vende të BE-së, përfshirë Norvegjinë dhe Zvicrën, 461.300 kërkesa janë depozituar në vitin 2020, në raport me 671.200 një vit më parë.

Kjo ulje e konsiderueshme prej 31 për qind reflekton impaktin e pandemisë së COVID-19 dhe masat e urgjencës, të tilla si kufizimet e qarkullimit”, theksoi EASO në një komunikatë.

Rreth 4% e dosjeve në 2020 janë depozituar nga azilkërkuesit e paraqitur si minorenë të pashoqëruar, një rritje prej 1 për qind në raport me një vit më parë.

Vendet kryesore të origjinës së azilkërkuesve mbeten të pandryshuara. Sirianët janë ata që kanë paraqitur më shumë aplikime 64.540 (-9% krahasuar me 2019) dhe përfaqësojnë 14% të kërkesave. Më pas vijnë afganët me 48.578 kërkesa (-16%), venezuelasit 30.643 (-32%), kolumbianët 29,438 (-9%) dhe irakianët 18.167 (-40%).

“Pavarësisht nga pandemia, autoritetet kombëtare të ngarkuara me shqyrtimin e kërkesave të azilit kanë mbajtur pothuajse të njëjtin nivel të vendimeve të shkallës së parë si në vitin 2019”, sipas agjencisë.

---