Zymjanët e Hasit shënuan „Ditët e Diasporës“

Në kuadër të manifestimit tradicional “Ditët e Diasporës 2012”, në Zym të Hasit u mbajtën aktivitete të ndryshme kulturore e artistike

Zymjanët të njohur për zanatin e bukës, kanë bërë që të njihen në të gjithë Ballkanin dhe në tërë Evropën madje deri në Amerikë. Me këtë rast zymjanët nuk harruan traditën, kulturën duke marrë me vete kudo kujtimet për vendlindjen e tyre.

Madje sipas një raporti dërguar Vatikanit më 1704 del se zymjanët janë marre edhe me vreshtari e furrtari.

Në fjalën përshëndetëse zëvendësministri i Diasporës, Qerim Bajrami, ka përgëzuar zymjanët mërgimtarë për këtë organizim madhështor dhe tradicional të cilët do ta kenë gjithherë mbështetjen e Ministrisë së Diasporës.

Në këtë manifestim morën pjesë dy ansamble të njohura, shoqëria kulturo – artistike “Vëllazërimi” nga Greqia dhe ansambli etno- kulturore “Katarina Josipi” nga Zymi i Hasit, që me një program mjaft të pasur artistik para një publiku të gjerë, recituan poezi, kënduan këngë labe, këngë patriotike dhe valle tradicionale, njofton MeD.

Në fund zëvendësministri i Diasporës, Qerim Bajrami së bashku me njërin nga bukëpjekësit e vjetër nga Zym i Hasit Dodë Lekaj, e zbuluan lapidarin “ Guri i Gurbetçarit”, i cili mban mbishkrimin e Ministrisë së Diasporës.