Zvicrës i ikën edhe një lojëtar nga Kombëtarja

(KEYSTONE/Peter Klaunzer)

Edhe një lojëtar i Kombëtares së Zvicrës i ka thënë lamtumirë përfaqësueses helvetike. Bëhet fjalë për Fabian Schar i cili përmes rrjeteve sociale njoftoi për pensionimin nga përfaqësuesja e Zvicrës në futboll, transmeton albinfo.ch.

“Pas më shumë se dhjetë vitesh dhe 86 ndeshjeve për Zvicrën, ka ardhur koha për të thënë lamtumirë. Unë kam qenë në gjendje të përfaqësoj vendin tim në tri Kupa Botërore dhe tri Kampionate Evropiane. Kam përjetuar momente tepër të bukura me ekipin kombëtar dhe emocionet që kam mundur të përjetoj do të qëndrojnë me mua për pjesën tjetër të jetës sime. Është gjithashtu koha për t’u thënë faleminderit shokëve të skuadrës, stafit dhe trajnerëve dhe sigurisht familjes time dhe atyre përreth meje. Mbi të gjitha, dua të falënderoj tifozët zviceranë që më kanë mbështetur gjatë këtyre viteve”, ka shkruar ai në rrjetet sociale.

Schar ka zhvilluar 86 ndeshje me Zvicrën duke shënuar 8 gola derisa largimi i tij vjen pas tërheqjes së Xherdan Shaqirit e Yann Sommerit.