Zvicra shënon inflacion negativ në maj, çfarë nënkupton kjo për ekonominë?

Inflacioni vjetor në Zvicër ka rënë lehtësisht në maj, duke kaluar përkohësisht në territor negativ, sipas Zyrës Federale të Statistikave (FSO). Ky zhvillim ka ringjallur frikën për një periudhë deflacionare dhe norma interesi negative. Por çfarë nënkupton kjo për fuqinë blerëse të familjeve?

Sipas FSO, indeksi i çmimeve të konsumit (CPI) ra me -0.1 % muajin e kaluar, duke arritur në 107.6 pikë. Në krahasim mujor, inflacioni shënoi një rritje të vogël prej 0.1 %.

Lajm i mirë apo i keq? Varet nga këndvështrimi

Në teori, kjo rënie e lehtë e çmimeve është lajm i mirë për buxhetet familjare. Rënia është kryesisht rezultat i forcës së frangës zvicerane, e cila e bën më të përballueshëm importin e produkteve. Ky zhvillim ndihmon në kompensimin e rritjes së vazhdueshme të çmimeve të produkteve dhe shërbimeve vendase, veçanërisht të qirave, të cilat ushtrojnë presion në rritjen e çmimeve, transmeton albinfo.ch.

Por në një këndvështrim më të gjerë, nëse kjo prirje konfirmohet, mund të jetë e dëmshme për ekonominë. Disa ekspertë besojnë se rënia e çmimeve do të përfitohet kryesisht nga bizneset dhe më pak nga konsumatorët. Këtë mendim e ndan edhe profesori i ekonomisë monetare në Universitetin e Friburgut, Sergo Rossi:

“Falë frangut të fortë, kompanitë që importojnë do të paguajnë më pak. Ato mund të ulin pak çmimet, por do të përpiqen të rrisin marzhet e fitimit. Nëse fitojnë 10 % nga franga e fortë, mund të ulin çmimet me vetëm 2 %, ndërsa diferenca përkthehet në fitim shtesë.”

Rreziku i deflacionit dhe ndikimi te bizneset

Një tjetër rrezik, nëse ekonomia hyn në cikël deflacioni, është se bizneset mund të përballen me vështirësi më të mëdha. Çmimet më të ulëta nënkuptojnë më pak të ardhura për ta, ndërkohë që shpenzimet, si qiratë apo pagat, mbeten të njëjta.

Një efekt tjetër negativ është ngadalësimi i konsumit. Nëse njerëzit presin që çmimet të bien më tej pas disa muajsh, do të shtyjnë blerjet.

Për momentin, Zvicra nuk është ende në këtë pikë. Por muajt në vijim do të jenë vendimtarë. Banka Kombëtare Zvicerane (SNB) po e ndjek nga afër situatën dhe mund të ndërhyjë.