Zvicra regjistron rastin e parë të infektimit me virusin e Nilit Perëndimor

Në Zvicër është regjistruar rasti i parë i infeksionit

Zvicra ka regjistruar rastin e parë të infektimit të brendshëm me virusin West Nile, dhe ai është konfirmuar në kantonin Ticino. Departamenti kantonal i Shëndetësisë dhe mjeku kantonal njoftuan se personi i prekur ka shfaqur simptoma të rënda neurologjike dhe është trajtuar për disa ditë në spital, përcjell albinfo.ch.

Autoritetet theksojnë se popullsia nuk është në rrezik, pasi virusi nuk transmetohet nga njeriu te njeriu dhe sezoni i mushkonjave tashmë ka përfunduar. Rekomandimet ekzistuese të mbrojtjes kundër mushkonjave mbeten të pandryshuara.

Sipas autoriteteve në Ticino, rasti konsiderohet i pritshëm, duke qenë se virusi ishte zbuluar më herët te mushkonjat e monitoruara nga institucionet shkencore në rajon, ndërsa përhapja e tij në Italinë verilindore është e dokumentuar.

Personi i infektuar kishte zhvilluar simptoma drejt fundit të verës, të ngjashme me meningoencefalitin. Rastet e tilla të rënda janë të rralla; shumica e infeksioneve kalojnë pa simptoma ose shfaqin shenja të lehta. Vetëm në raste të veçanta virusi mund të shkaktojë inflamacion të trurit ose të cipave të trurit.

Ndryshe nga sëmundje të tjera të transmetuara nga mushkonjat, virusi West Nile nuk kalon nga një njeri tek tjetri. Transmetimi ndodh ekskluzivisht midis mushkonjave dhe zogjve.

Autoritetet shëndetësore të Ticinos do të vazhdojnë të monitorojnë nga afër situatën dhe do të publikojnë rekomandimet e përditësuara të mbrojtjes kundër mushkonjave në fillim të verës së ardhshme.

---