Zvicra, në konferencën kundër martesave të dhunshme dhe gjymtimit gjenital të femrave

Synetia ose gjymtimi gjenital i femrave është i përhapur veçanërisht në Afrikë dhe në pjesë të Azisë, ku brenda vitit janë në rrezik akut 3 milionë vajza

“Një ardhmëri pa gjmtim gjenital (syneti) të femrave dhe martesa të dhunshme të fëmijëve”. Ky është synimi që ka në fokus tubimi “Girl Summit 2014” (Konferenca e vajzave), i cili po mbahet sot në Londër. Në konferencë merr pjesë si përfaqësuese e Zvicrës ambasadorja Nicole Wyrsh, përgjegjëse për çështje të politikës së të drejtave të njeriut në Departamentin e Punëve të Jashtme të Zvicrës (EDA).

Vlerësohet se brenda vitit në botë 14 milionë vajza martohen në mënyrë të detyruar, më të rejat ndër to janë vetëm tetë vjeçare. Synetia ose gjymtimi gjenital i femrave është i përhapur veçanërisht në Afrikë dhe në pjesë të Azisë, ku, sipas vlerësimeve të OKB-së brenda vitit janë në rrezik akut 3 milionë vajza. 125 milionë femra vlerësohet se tashmë janë të synetuara në gjithë botën, në disa vende afrikane madje 9 nga 10 femrat janë të prekura nga kjo. Ky fenomen i pengon vajzat në zhvillimin e tyre dhe ndikon në shëndetin e tyre psikik, fizik dhe seksual. Përmes migrimit kjo praktikë është bartur edhe në Zvicër, thuhet në një komunikatë të EDA-s.

Objektiv i “Girl Summit 2014”, në të cilin marrin pjesë rreth 800 përfaqësues/e qeverish dhe ekspertë nga shoqëria civile dhe organizata ndërkombëtare është ngritja e një lëvizjeje në nivel botëror që do të mundësonte zhdukjen e këtyre dy praktikave brenda një gjenerate

Ndër masat që “Girl Summit” do të marrë në këtë drejtim janë aksionet në nivele nacionale, implementimi i ligjeve, transmetimi i dijes dhe aftësive si dhe një ofertë me institucione dhe shërbime për gratë dhe vajzat të prekura.

Nicole Wyrsch, ambasadore për të drejtat e njeriut në EDA, para pjesëmarrësve të konferencës pritet të prezantojë aktivitetet e shumta të mbajtura ë Zvicër rreth kësaj teme. Është synim i këtyre aktiviteteve që të përfitohen edhe diasporat.

Por, angazhimi i Zvicrës në këtë drejtim shprehet në radhë të parë përmes ligjit federal mbi masat kundër martesave të dhunshme, që ka hyrë në fuqi në korrik 2013. Në këtë mes hyn edhe programi i masave kundër martesave të dhunshme për periudhën 2013-2015.