Zvicra mbështet specializimin e kuadrove të psikologjisë klinike

Projekti i miratuar nga Qeveria e Zvicrës ka vlerën prej 500.000 eurove për periudhën 2012-2014

Ministri i Shëndetësisë i Republikës së Kosovës, Ferid Agani gjatë një takimi të realizuar të hënën me Markus Baechler, drejtor i Zyrës Zvicerane për bashkëpunim në Kosovë ka diskutuar modalitetet e projektit –programit të  specializimeve nga lëmi i Psikologjisë klinike, i cili pritet të fillojë së zbatuari gjatë këtij viti në Kosovë, raportojnë mediet në Prishtinë

Ministri Agani e falënderoi Qeverinë e Zvicrës për kontributin e jashtëzakonshëm që është duke e dhënë për zhvillimin e shërbimeve shëndetësore të shëndetit mendor në Kosovë në tërë periudhën e pasluftës dhe ndjeshmërinë e madhe që vazhdon ta tregojë lidhur me këtë çështje aktualisht.

Specializimi i kuadrove në lëmin e psikologjisë klinike do të paraqesë kontribut të rëndësishëm për mirëqenien psiko-sociale të qytetarëve të Kosovës.

Projekti i miratuar nga Qeveria e Zvicrës ka vlerën prej 500.000 eurove për periudhën mars 2012- dhjetor 2014.