Zvicra mbështet bujqësinë kosovare

Ambasadorja Marty Lang, ka uruar ministrin Krasniqi për detyrën e re dhe ka rikonfirmuar gatishmërinë për të ndihmuar zhvillimin bujqësor në Kosovë

Ambasadorja e Zvicrës në Kosovë, Krystyna Marty Lang ka premtuar mbështetjen e shtetit helvetik për bujqësinë kosovare. Ajo të mërkurën është takuar me ministrin e Bujqësisë, Pylltarisë dhe Zhvillimit Rural, Memli Krasniqi, nga i cili është njoftuar me zhvillimin e sektorit rural në vend.

Ambasadorja Marty Lang, ka uruar ministrin Krasniqi për detyrën e re dhe ka rikonfirmuar gatishmërinë për të ndihmuar zhvillimin bujqësor në Kosovë.

Ministri Krasniqi ka falënderuar ambasadoren Marty Lang për mbështetjen që Zvicra i ka dhënë në vazhdimësi Kosovës për zhvillimin e sektorëve të ndryshëm, duke përfshirë edhe atë të bujqësisë.

Ai po ashtu e ka njoftuar ambasadoren edhe për progresin që është shënuar në këtë sektor, si dhe për investimet të cilat planifikohet të bëhen në kuadër të Programit për Bujqësi dhe Zhvillim Rural.

Më tej, ministri Krasniqi, ka treguar se me dyfishimin e buxhetit për bujqësinë do të rritet përkrahja financiare për fermerët dhe agrobizneset vendore. Ministri shprehi gatishmërinë e tij për të thelluar edhe më tej partneritetin mes Kosovës dhe Zvicrës, me qëllim të zhvillimit të mëtejmë të sektorit të bujqësisë.