Me aksionin më të madh të riatdhesimit në histori, Zvicra kthen në vend 3700 veta

Janë realizuar 16 fluturime dhe rreth 3.700 njerëz janë kthyer nga vende të ndryshme

Ministri i jashtëm i Zvicrës, Ignazio Cassis u është drejtuar sot mediave në konferencën për shtyp që po mbahet për çdo ditë në Bernë, që nga shpërthimi i krizës së koronavirusit. Ai, në fillim u ka bërë thirrje qytetarëve që, për shkak të situatës së rëndë me pandeminë, të mos shkojnë në Tiçino për festën e Pashkëve, shkruan srf.ch.

Pastaj, ka vazhduar ai: 800,000 qytetarë zviceranë jetojnë jashtë vendit. EDA (Ministria e Jashtme) ka nisur dy javë më parë fushatën më të madhe të kthimit në Zvicër, transmeton albinfo.ch. Në këtë kuadër janë realizuar 16 fluturime dhe rreth 3.700 njerëz janë kthyer nga vende të ndryshme.

Kjo është realizuar në disa raste edhe në bashkëpunim me vendet fqinje. Midis të kthyerve janë 2100 shtetas zviceranë dhe 1600 të huaj, përcjell albinfo.ch. Tani janë planifikuar edhe pesë fluturime të tjera.

Misionet diplomatike do të mbështesin udhëtarët e bllokuar në të gjithë botën, ka thënë Cassis. Zvicra ka 170 përfaqësi në botë, dhe tani po bëhet e qartë se sa i rëndësishëm është ky “rrjet i jashtëm”. “Nevojiten marrëdhënie të mira diplomatike me vendet përkatëse para krizës, në mënyrë që të keni mundësi t’i përdorni ato shpejt gjatë krizës.”

---