Zvicra hedh poshtë kritikat e BE-së

Byroja Integruese e Departamentit të jashtëm thotë se „marrëveshjet bilaterale me BE-në po funksionojnë përgjithësisht mirë"

Zvicra ka reaguar ndaj kritikave të ardhura nga ambasadori i BE-së në këtë vend për mungesë vullneti për kooperim të Zvicrës me BE-në. Në komunikatën e lëshuar nga Byroja Integruese në kuadrin e Departamentit të Jashtëm thuhet se „nga pikëpamja e Zvicrës marrëveshjet bilaterale me BE-në po funksionojnë përgjithësisht mirë”.

Duke shkoqitur pikat tjera të kritikuara, kjo byro ka theksuar se Zvicra ka propozuar tashmë disa zgjidhje konstruktive lidhur me regjimin e taksave kantonale, por këto propozime janë hedhur poshtë nga së paku njëri shtet anëtar i BE-së (Italia).

Po ashtu, sipas kësaj byroje, edhe masat mbrojtëse që i aplikon Zvicra lidhur me lirinë e lëvizjes, janë në përputhje me marrëveshjen për lëvizjen e lirë. Kritikat nga Bashkimi Evropian, të drejtuara dje përmes ambasadorit të saj në Zvicër kishin të bënin me „devijimin e Zvicrës nga marrëveshjet e arritura me BE-në”. Ambasadori po ashtu kishte thënë se Zvicra, me mospërmbajtjen ndaj detyrimeve të marra, “ka sjellë BE-në kufijtë e durimit”.