Zvicra do të dërgojë lopë në Shqipëri

Ministri i Bujqësisë, i Zhvillimit Rural dhe i Administrimit të Ujërave nga Shqipëria, Edmond Panariti, u takua në Bernë me drejtorin e përgjithshëm të Zyrës Federale Zvicerane të Bujqësisë, Bernard Lehmann, ku mori mbështetjen për zëvendësimin e blegtorisë së dëmtuar nga sëmundja LDS, si dhe mbështetje për rritjen e kapaciteteve laboratorike në disa fusha të bujqësisë në Shqipëri, transmeton albinfo.ch.

Siç raportojnë mediat në Tiranë, fillimi i një projekti të përbashkët për zëvendësimin e blegtorisë së dëmtuar nga sëmundja e Dermatozës Nodulare, si dhe përmirësimi i racës së gjedhit, ishte në qendër të bisedave me ministrit Panariti dhe drejtorit Lehmann në Bernë.

Pala zvicerane u angazhua të dërgojë një tufë të përzgjedhur lopësh race në zonat e prekura, me qëllim zëvendësimin dhe përmirësimin e racave të gjedhit.

Ndërsa një ekip ekspertësh zviceranë të blegtorisë do të mbështesë gjithë procesin.

Ministri nga Shqipëria i kishte kërkuar drejtorit Lehmann edhe ndihmë në ngritjen e kapaciteteve laboratorike për analizën e tokave, farave, fidanëve dhe plehrave kimike.

Ndërkaq, Lehman, drejtori i Zyrës Federale të Bujqësisë, premtoi mbështetjen për bazën laboratorike.