Zvicerani që nuk ua shet veturën “jugosllavëve” dhe shqiptarëve

Pronari: makinën nuk ua shes “jugosllavëve” por vetëm zviceranëve. I interesuari: "Unë nuk jam jugosllav por shqiptar." Përgjigja: “Nuk e shes”

Një shqiptar 30 vjeçar nga Zvicra dëshironte ta blinte një makinë. Pasi që në një portal për shitblerje të veturave kishte gjetur një Jeep Grand Cherokee me çmim të volitshëm ai kishte hyrë në kontakt përmes whatsapp-it me shitësin. Chat-in në mes tyre me mesenxher e ka publikuar 20minuten.ch., duke e quajtur si rast të shprehjes raciste.

Në komunikim e sipër, pronari kishte shkruar se makinën nuk ua shiste “jugosllavëve” por vetëm zviceranëve, transmeton albinfo.ch. Duke u lidhur me këtë, blerësi potencial i kishte thënë: Ok, unë nuk jam jugosllav por shqiptar. Por përgjigja nga ana tjetër kishte qenë e prerë: “Nuk e shes”.

Siç tregon mikja e 30 vjeçarit, L.B., miku i saj shqiptar ishte prekur shumë nga kjo sjellje e shitësit. “Ai as që më njeh”, kishte qenë reagimi i tij i parë. Kjo kishte qenë hera e parë që ai kishte marrë një përgjigje të tillë ekstreme.

20Minuten e ka kontaktuar shitësin. Ai ka thënë për gazetën se problemi është në faktin se “merr vazdimisht oferta nga njerëz të cilët duan t`i eksportojnë veturat në Ballkan dhe prandaj bëjnë presion për uljen e çmimit”, përcjell albinfo.ch. Si shembull, disa “me një gjermanishte të dobët” kishin dashur të blinin nga ai një makinë për 100 franga edhe pse ai i kishte vënë një çmim më të lartë.

Sipas shitësit, emri “Jugo” në regjionin e tij në mes të shitësve të automjeteve është një shprehje e zakonshme kur bëhet fjalë për eksportuesit e makinave. “Kur dikush ka vozitur një veturë të re dhe pastaj dëshiron ta shesë, thuhet: jipja një “jugo”-je. Për këtë arsye ai thotë se në komunikim me shkrim me të interesuarin “nuk i jam referuar prejardhjes së tij”. Por ai mund ta marrë me mend se blerësit potencial kjo shprehje i është dukur e çuditshme.

---