Zviceranët gjithnjë e më shumë po gëzojnë pushime vjetore

Punonjësit që janë në sektorin “Arsim dhe trajnim” pushojnë më së shumti, 6.3 javë në vit

Punonjësit zviceranë gjithnjë e më shumë po kanë pushime vjetore, dhe brenda një periudhe prej 20 vjetësh, pushimi mesatar është rritur më shumë se gjysmë jave, shkruan “Swissinfo.ch”.

Aktualisht, numri minimal i ditëve në Zvicër për pushime është katër javë (20 ditë), ose pesë javë për ata nën moshën 20-vjeç.

Megjithatë, kontratat individuale ose kolektive, shpesh mund të sigurojnë një numër më të madh të ditëve për pushime, përcjell albinfo.ch.

Sipas shifrave zyrtare nga Zyra Federale e Statistikave (FSO), pushimi mesatar vjetor në Zvicër është 5.1 javë, gjysmë javë më shumë se kur filloi regjistrimi, 20 vjet më parë.

Sipas sektorëve, punonjësit në kategorinë “Arsim dhe trajnim” – veçanërisht mësimdhënësit – gëzojnë pushime më të mëdha, rreth 6.3 javë në vit. Transportet, financat, administratat publike, shëndeti dhe punonjësit e shërbimeve sociale janë gjithashtu mbi mesataren.

Më së paku pushime kanë punëtorët në sektorët e bujqësisë dhe pylltarisë, vetëm 4.6 javë çdo vit.

Zvicra nuk qëndron keq në krahasim me vendet tjera. Në SHBA nuk ka ligj për pushime minimale vjetore, derisa në Mbretërinë e Bashkuar është 28 ditë dhe 25 në Francë.

Ndërkohë, vetëm një e pesta e pushuesve zviceranë qëndrojnë në vend, derisa një e katërta shkojnë në Itali, si destinacion kryesor, kurse Spanja dhe Franca, gjithashtu mbeten zgjedhje popullore.