Zvicër: Të papunët mbi 60 vjeç do të marrin një ndihmë para pensionimit

Kushdo që çregjistrohet nga sigurimi i papunësisë, d.m.th. që e ka konsumuar gjithë afatin e papunësisë të paraparë me ligj, pas moshës 60-vjeçare duhet të marrë një përfitim “urë” deri në pension

Parlamenti i Zvicrës dëshiron që njerëzit të cilët mbeten të papunë pak para pensionimit, të mos varen më nga ndihma sociale.

Kushdo që çregjistrohet nga sigurimi i papunësisë, d.m.th. që e ka konsumuar gjithë afatin e papunësisë të paraparë me ligj, pas moshës 60-vjeçare duhet të marrë një përfitim “urë”, deri në pension, shkruan srf.ch. Kjo, sigurisht, pasi që të gjitha masat për riintegrim në tregun e punës të kenë qenë të pasuksesshme.

Këtë projekt e ka miratuar si Dhoma Nacionale ashtu dhe ajo e Kantoneve, transmeton albinfo.ch. Qëllimi i ligjit të ri federal është që të përmirësojë sigurinë shoqërore të të moshuarve që kanë humbur punën dhe pastaj edhe sigurimin e papunësisë.

Dhoma Nacionale ka bërë disa ndryshime nga në krahasim me Dhomën e Kantoneve lidhur me disa detaje. Për këtë arsye, çështja duhet të kthehet sërish në dhomën e vogël (të kantoneve).

Nga partitë parlamentare vetëm SVP ka mbështetur versionin e Dhomës së Kantoneve, i cili kërkonte që përfitimi të vlejë deri në pension të parakohshëm – dmth dy ose tri vjet më pak, gjegjësisht jo deri në moshën e plotësuar të pensionit

Për më tepër, Dhoma Nacionale ka zgjeruar rrethin e përfituesve, përcjell albinfo.ch. Përfitimet “Urë” nuk duhet t’u jepen vetëm atyre që janë çregjistruar nga ndihma e papunësisë pas ditëlindjes së 60-të, por të gjithë të çregjistruarve që tani janë 60-vjeçarë, pavarësisht nga koha e çregjistrimit nga ndihma e papunësisë.

---