Zvicër: Kompensimi për të vetëpunësuarit paguhet nga mesi i prillit

Personat e vetëpunësuar që nuk mund të kërkojnë kompensim në emër të punës me kohë të shkurtuar si dhe prindërit të cilët janë detyruar të ndërpresin punën e tyre për shkak të mbylljes së shkollave, janë kategoritë që kanë të drejtë të kërkojnë këtë kompensim

Konferenca e fondeve të kompensimit kantonal dhe Federata e fondeve të kompensimit e Zvicrës kanë dhënë një lajm të mirë sot për disa kategori të punüëuarish.

Për personat e vetëpunësuar, që janë të prekur nga kriza e koronavirusit, nga e hëna (nesër) do të jenë në dispozicion në internet  informacionet dhe formularët e nevojshëm online për kompensimin që do të marrin, shkruan srf.ch.

Sipas vendimit të Këshillit Federal, personat e vetëpunësuar që nuk mund të kërkojnë kompensim në emër të punës me kohë të shkurtuar si dhe prindërit të cilët janë detyruar të ndërpresin punën e tyre për shkak të mbylljes së shkollave, janë kategoritë që kanë të drejtë të kërkojnë këtë kompensim, transmeton albinfo.ch

Po ashtu këtë të drejtë e kanë edhe personat të cilët ndodhen në karantinë, me urdhër të mjekut.

Fondet e kompensimit konsiderojnë se kompensimet nga fondet në fjalë mund të rrjedhin nga mesi i prillit.

---