Zvicër: Këto barna nuk jepen më shumë se nga një “kuti” për person

Kjo urdhëresë e re prek para së gjithash medikamentet si: aspirina, paracetamoli, ibuprufeni dhe ponstani

Ndonëse Qeveria kishte paralajmëruar se mallra, kryesisht artikuj ushqimor dhe barna do të ketë në sasi të mjaftueshme, një raportim i ri e tregon gjendjen pak më ndryshe.

Këshilli Federal ka njoftuar të mërkurën se për shkak të koronavirusit, ka urdhëruar racionimin e barnave që përdoren për uljen e temperaturës, shkruan srf.ch. Mjekët dhe barnatoret nuk kanë të drejtë të japin më tepër se një paketë barnash të tilla për person, transmeton albinfo.ch.

Kjo urdhëresë e re prek para së gjithash medikamentet si: aspirina, paracetamoli, ibuprufeni dhe ponstani. Urdhri që ka hyrë në fuqi pasditen e të mërkurës do të vlejë për gjashtë muajt në vijim!

Mediat ndërkaq shkruajnë se disa nga medikamentet ditëve të fundit nuk kanë mundur të gjenden në barnatore, përcjell albinfo.ch. Shkak për këtë nuk ka qenë mungesa e tyre por blerja me shumicë nga qytetarët e frikësuar.

“Për shkak të kërkesës së madhe, nuk ka mundur të funksionojë zinxhiri i furnizimit”, ka deklaruar për agjencinë Keystone – SDA, një zëdhënëse e federatës së farmacistëve të Zvicrës.

---