Zvicër: Gratë viktima të dhunës “duhet të merren më seriozisht”

Policia, gjyqësori dhe shërbimet e mirëqenies sociale të Zvicrës duhet të forcojnë nivelet e besimit midis grave që janë viktima të dhunës.

Ministrja e Drejtësisë, Karin Keller-Sutter, nisi një iniciativë mbarëkombëtare që bashkon aktorët kryesorë në nivel federal dhe kantonal.

Ajo vjen në sfondin e kritikave nga organet ndërkombëtare se Zvicra duhet të bëjë më shumë për të mbrojtur gratë nga aktet e dhunës, transmeton albinfo.ch.

Javën e kaluar, një raport nga Këshilli i Evropës foli për një “vazhdimësi të stereotipeve gjinore brenda gjyqësorit që mund të çojë në gratë viktima të dhunës me bazë gjinore të ndjehen fajtore dhe që serioziteti i kësaj dhune të nënvlerësohet”, në Zvicër.

“Gratë viktima të dhunës nuk kanë qasje të barabartë në strehim dhe ndihmë cilësore në gjithë vendin”, shtoi raporti.

Kjo vjen pasi Kombet e Bashkuara kërkuan një harmonizim më të mirë të të drejtave të grave midis të gjitha kantoneve.

Thelbi i të dy raporteve është se ndërsa Zvicra po bën përparim në reformat ligjore dhe zbatimin e Konventës së Stambollit për dhunën ndaj grave, disa struktura dhe qëndrime të rrënjosura duhet të ndryshojnë.

Keller-Sutter është e vendosur t’u japë viktimave të dhunës besim më të madh për të paraqitur ankesat e tyre.

“Duhet të sigurohemi që viktimat të ndiejnë se po merren seriozisht”, tha ajo.

Nisma e fundit është të kombinohet me dialogun strategjik “Dhuna në familje” në pranverë dhe të koordinohet ngushtë me Planin Kombëtar të Veprimit për Zbatimin e Konventës së Stambollit.