ZRRE: Nga 16 gushti ndërpritet rryma për bizneset pa kontrata në tregun e lirë

KESCO

Zyra e Rregullatorit për Energji (ZRRE) ka njoftuar se nga data 16 gusht 2025, të gjithë konsumatorët komercialë që nuk kanë nënshkruar kontratë me një furnizues të licencuar në tregun e lirë do t’u ndërpritet furnizimi me energji elektrike, raporton albinfo.ch.

Ky vendim vjen pas aktgjykimit të Shkallës së Dytë të Gjykatës Komerciale, e cila ka refuzuar kërkesën për shtyrjen e liberalizimit të tregut të energjisë. Sipas ZRRE-së, procesi është zhvilluar në përputhje të plotë me ligjin, në mënyrë transparente dhe të paanshme, ndërsa ligjshmëria e tij është konfirmuar edhe nga gjykatat kompetente.

“ZRRE u bën thirrje të gjithë konsumatorëve komercialë që ende nuk kanë lidhur kontratë furnizimi, të veprojnë pa vonesë dhe të zgjedhin një nga furnizuesit e licencuar të publikuar në faqen zyrtare, sepse nga data 16 gusht do të ndërpriten nga rrjeti energjetik”, thuhet në njoftim.

Në mars të këtij viti, ZRRE kishte shpallur hapjen e tregut të energjisë për bizneset e mëdha, një vendim që prek mbi 1000 kompani private. Megjithatë, më vonë Gjykata Komerciale kishte anuluar njoftimin dhe një pjesë të vendimit për liberalizim, duke e konsideruar të kundërligjshëm dhe të paqartë në disa pika.

Pavarësisht kësaj, Shkalla e Dytë e Komerciales tani ka vërtetuar vlefshmërinë e procesit, duke hapur rrugën për zbatimin e plotë të liberalizimit të tregut energjetik në Kosovë, raporton albinfo.ch.