Zjarr në aeroplanin e vogël që po aterronte në Bazel, tre të lënduar

Të dy pistat e aeroportit u desh të mbylleshin për një kohë të shkurtër. Ato janë rihapur pas orës 17:30, pasdite

Një aeroplan të vogël ka shpërthyer zjarri kur po aterronte në Aeroportin Bazel-Mulhouse. Avioni privat i tipit Piper PA-28 nga kompania ajrore General Aviation arriti të ndalonte pranë pistës. Kështu është bërë e ditur të enjten në mbrëmje nga Euroairport Basel-Mulhouse , shkruan sda.ch.

Aksidenti ka ndodhur rreth orës 16 të pasdites, transmeton albinfo.ch. Departamenti i zjarrfikjes ka arritur të shuante shpejt zjarrin.

Gazeta e përditshme franceze “Dernières Nouvelles d’Alsace” (ADN) ka raportuar se në aeroplan kishin qenë tre zviceranë, meshkuj, të moshave 30, 35 dhe 60 vjeçare, përcjell albinfo.ch. Zëdhënësja e EuroAirport Claire Freudenberger nuk ka dashur të deklarojë për agjencinë e lajmeve Keystone-SDA asgjë lidhur me kombësinë e të lënduarve. Tre personat në fjalë, janë dërguar në spital.

Ende nuk është e qartë se çfarë e ka shkaktuar aksidentin. Sipas gazetës ADN, zjarri kishte shpërthyer në kabinë. Të dy pistat e aeroportit u desh të mbylleshin për një kohë të shkurtër. Ato janë rihapur pas orës 17:30, pasdite.

---