Xhubleta shqiptare ngjitet në skenën e Javës së Modës në Milano

Moralda Durra sjell xhubletën shqiptare në skenën ndërkombëtare të modës

Në kuadër të Javës së Modës në Milano, u prezantua një koleksion i veçantë i frymëzuar nga xhubleta shqiptare, i realizuar nga stilistja Moralda Durra dhe i titulluar “Një mijë e një fije”, transmeton albinfo.ch.

Koleksioni paraqet një homazh bashkëkohor për veshjen më të hershme tradicionale shqiptare, duke risjellë në kujtesë fillesat e trashëgimisë kulturore të popullit shqiptar. Sfilata u organizua në Hotel Four Seasons të Milanos, ngjarje që mori vëmendjen e mediave dhe dashamirësve të modës ndërkombëtare, njofton ATSH.

Koleksioni “Një mijë e një fije” kishte fituar çmimin e parë në Muza Competition 2025, të mbajtur në korrik, një projekt i mbështetur nga Ministria e Ekonomisë, Kulturës dhe Inovacionit.

Modelet janë ndërtuar kryesisht me shajak të zi – stof leshi tradicional – dhe të zbukuruara me gajtanëprej fijeve të zeza. Përmes një qasjeje moderne dhe konceptuale, Durra riinterpreton thelbin e xhubletës, duke e parë atë si një urë që lidh gratë shqiptare të shoqërisë së hershme me ato të kohës bashkëkohore.

Xhubleta shqiptare u shpall në vitin 2022 pjesë e trashëgimisë kulturore botërore të mbrojtur nga UNESCO, duke u kthyer kështu në një simbol të identitetit dhe historisë sonë kombëtare. /Albinfo.ch 

---