Walter: Nuk do të ndërmerret asgjë rreth raportit të Marty-t

Kryetari i Dhomës së lartë të Parlamentit të Zvicrës, Hansjörg Walter ka vlerësuar se do të jetë vështirë të merret aktgjykim për atë rast

Bashkësia Ndërkombëtare sigurisht se nuk do të ndërmarrë asgjë lidhur me raportin e Dick Marty-t, për tregtinë ilegale me organe në Kosovë, ka thënë Kryetari i Dhomës së lartë të Parlamentit të Zvicrës, Hansjörg Walter.

Walter ka deklaruar në Beograd se është me rëndësi që Këshilli i Evropës të rekomandojë që të hetohen të gjeturat e raportuesit Dick Marty për tregti me organe në Kosovë. Por ai ka vlerësuar se do të jetë vështirë për të marrë aktgjykim për atë rast, raportojnë mediat serbe.

”Është me rëndësi se KE të rekomandoj që të hetohet rasti. Me rëndësi është që gjetjet të hetohen, por si duket do të jetë më vështirë të ketë aktgjykim”, ka theksuar Walter në konferencën për gazetarë në Kuvendin e Serbisë, pas takimit me kryetaren e atij trupi, Sllavica Gjukiq Dejanoviq.