Walker propozon këtë emër për president të Kosovës, letër liderëve të partive politike

albinfo.ch

Ish-ambasadori amerikan William G. Walker u ka dërguar letra katër liderëve politikë në Kosovë, duke propozuar Faton “Tony” Bislimin si kandidat për presidentin e ardhshëm të vendit.

Letrat u janë drejtuar kryeministrit Albin Kurti, kryetarit të LDK-së, Lumir Abdixhiku, kryetarit të PDK-së, Bedri Hamza, si dhe kreut të AAK-së, Ardian Gjini. Përmbajtjen e tyre e ka siguruar Kanal10.

Në letrat drejtuar liderëve politikë, Walker shpreh shqetësimin e tij lidhur me bllokimin e procesit kushtetues për zgjedhjen e presidentit të ri të Kosovës. Sipas tij, vendit i nevojitet një figurë që ka përvojë ndërkombëtare, përgatitje profesionale dhe përkushtim ndaj Kosovës.

Walker shkruan se ka dëgjuar emrat e disa kandidatëve të mundshëm për postin e presidentit, por vlerëson se Bislimi i posedon cilësitë dhe përvojën e nevojshme për ta ushtruar këtë detyrë.

“Në opinionin tim, ndër të gjithë emrat e mundshëm, Tony i posedon të gjitha aftësitë e nevojshme dhe personalitetin për të qenë një president i suksesshëm”, shkruan Walker në letrën e siguruar nga Kanal10.

Ish-ambasadori amerikan rendit gjashtë karakteristika që, sipas tij, e bëjnë Bislimin kandidat të përshtatshëm: njohuritë për botën përtej Kosovës, formimin akademik, aftësitë gjuhësore, njohjen e thellë të historisë dhe proceseve politike të Kosovës, personalitetin, si dhe aftësinë për të qenë një kandidat konsensual.

Walker thekson në veçanti se Kosovës i nevojitet një president që përfaqëson vendin në tërësi dhe jo një parti politike apo një qëndrim të caktuar politik.

Sipas tij, Faton “Tony” Bislimi do të mund të ishte një figurë rreth së cilës partitë politike mund të arrinin konsensus për zgjedhjen e presidentit të ardhshëm të Kosovës.