Vuçiq pret nënsekretaren amerikane, ankohet për “presionin që po i bëhet Serbisë”

Sot, presidenti i Serbisë, Aleksandar Vuçiq, i ka kërkuar nënsekretares së Shtetit për Diplomacinë dhe Çështjet Publike të Shteteve të Bashkuara të Amerikës, Elizabeth Allen, që SHBA-ja ta rrisë angazhimin dhe të përdorë ndikimin për ta ruajtur stabilitetin në rajon, përcjell albinfo.ch.

Po ashtu ai iu ankua Allenit në takimin që e patën në Beograd edhe për presionin “me të cilin po përballet Serbia dhe serbët”.

“Kam vënë në dukje presionet me të cilat ballafaqohet Serbia dhe serbët dhe kërkova nga SHBA-ja që të rrisë angazhimin dhe të përdorë ndikimin e saj për të ruajtur stabilitetin e rajonit dhe për të krijuar parakushte për bashkëpunim të sinqertë dhe përparim konkret të rajonit dhe të gjithë qytetarëve tanë drejt një të ardhme më të mirë dhe më të begatë”, ka shkruar Vuçiq në Instagram të mërkurën.

Ai ka thënë se kanë biseduar edhe për çështje rajonale dhe gjeopolitike, si dhe për forcimin e marrëdhënieve bilaterale ndërmjet Serbisë dhe SHBA-së.

Alleni do ta vizitojë edhe Kosovën.