Vuçiq për procesin e betimit të kryetarëve në veri: Kurrë s’do të jenë të pranuar

Vuçiq: Situata në veri, e tensionuar, kryetarët e “rrejshëm” nuk do të pranohen kurrë nga serbët

Presidenti i Serbisë, Aleksandar Vuçiq, e ka quajtur si të tensionuar situatën, sidomos në veri të Kosovës, përcjell albinfo.ch.

Situata është shumë e tensionuar, ata do të tentojnë nesër në ndërtesën e Komunës në Mitrovicën e Veriut të mbajnë seanca konstituive për tri komuna dhe të zgjedhin kryetarët e “rrejshëm” të mbështetur nga ambasadat e Quintit, në zgjedhjet më të këqija, me një dalje mesatare prej 3.4 për qind, tha presidenti serb Vuçiq.

Vuçiq deklaroi se dje ka pasur një konferencë telefonike me këshilltarin e lartë në Departamentin e Shtetit, Derek Schole, të dërguarin special të SHBA-së, Gabriel Escobar dhe ambasadorin Hill.

Ai në një adresim të tij ka komentuar edhe procesin e betimit të kryetarëve të rinj të zgjedhur në procesin e 23 prillit, të cilët i ka quajtur kryetarë të rremë që, sipas tij, janë zgjedhur me vetëm 3.4 për qind të votave të përgjithshme.

“Gjëja e vetme që jam duke ua kërkuar serbëve është qetësia, sepse ata kurrë nuk do të jenë të pranuar si kryetarë. Ky është një veprim shtypës ndaj serbëve dhe një përpjekje për të krijuar një atmosferë në të cilën ata do të jenë të detyruar t’i lënë shtëpitë e tyre”, ka thënë Vuçiq.

Vuçiq nuk ka treguar se çka konkretisht ka biseduar me këshilltarin e Departamentit Amerikan të Shtetit, Derek Choller, të dërguarin për Ballkanin, Gabriel Escobar dhe Ambasadorin Christopher Hill.

 

---