Vrasjen në dasmën në Ferizaj dyshohet se e kreu një zyrtar policor, arrestohet

Vritet në dasëm gjyshi i dhëndrit

Një zyrtar policor është arrestuar për vrasjen që ndodhi në afërsi të një restoranti dasmash në fshatin Bibaj të Ferizajt.

Lajmin për Klankosova.tv e ka konfirmuar zëdhënësi i policisë për rajonin e Ferizaj, Qazim Reka, i cili tha se në lidhje me rastin është njoftuar Prokuroria Themelore në Ferizaj dhe IPK-ja.

“Sipas informacioneve fillestare, i dyshuari për kryerjen e kësaj vrasjeje është një zyrtar policor, i cili është arrestuar. Në lidhje me rastin është njoftuar Prokuroria Themelore në Ferizaj dhe Inspektorati Policor”, tha Reka.

Tutje, ai tha se viktima i përket vitit të lindjes 1935, teksa nuk i bëri të ditura motivet.

Ndërsa, zëdhënësi i IPK-së, Arbër Beka, tha se dyshimet fillestare janë se i dyshuari ishte jashtë detyrës zyrtare në momentin që ka ndodhur ngjarja.

“Dyshimet fillestare janë se një zyrtar, jashtë detyrës zyrtare, është i përfshirë në këtë rast. Ekipet e IPK-së janë duke shkuar në vendin e ngjarjes dhe njësitet tjera janë aty”, tha ai.

 

---