Votat e diasporës: Ja kush kryeson deri më tani

Keystone (AP Photo/Vlasov Sulaj)

Numërimi i votave nga diaspora po vijon në Parkun Olimpik në Shqipëri, ku deri tani janë numëruar 45,470 zarfe nga një total prej 194,889 që kanë mbërritur nga shqiptarët jashtë vendit.

Për momentin, Partia Socialiste kryeson me një rezultat domethënës prej 54.57% të votave të diasporës, duke marrë gjithsej 24,629 vota.

Pas saj, renditet Koalicioni Partia Demokratike – Aleanca për Shqipërinë Madhështore (PD-ASHM) me 28.44% të votave, ose 12,837 vota të marra nga shqiptarët jashtë vendit, transmeton albinfo.ch.

Po ashtu, Nisma Shqipëria Bëhet ka marrë 8.44% të votave, duke siguruar gjithsej 3,810 vota. Ndërkohë, Partia Mundësia ka marrë 3.26% të votave, ose 1,471 vota. Lëvizja Bashkë ka mbështetje nga 2.60% e votuesve, ose 1,174 vota.

Partitë më të vogla si Partia Socialdemokrate (0.98%), Partia Koalicioni Euroatlantik (0.67%), Partia Aleanca Kombëtare Shqiptare (0.58%), dhe Koalicioni Djathtas për Zhvillim (0.28%) kanë siguruar një numër më të vogël votash, por ende janë pjesë e procesit të numërimit. Lëvizja Atdheu dhe Partia Aleanca Demokracia e Re kanë siguruar gjithsej 0.14% dhe 0.04% të votave respektivisht.