“Vogue”: Vizitojeni Prizrenin dhe Himarën

Në mesin e gjashtë vendeve gjendet edhe Prizreni dhe Himara e Shqipërisë. Prizreni cilësohet nga “Vogue”, si qendra e kreativitetit të Kosovës, e vendosur në afërsi të Maleve të Sharrit

Revista e famshme “Vogue” ka publikuar një artikull, në të cilin i njofton turistët për gjashtë qytete që ndodhen në vendet e Ballkanit dhe i këshillon ata për t’i vizituar gjatë vitit 2017, përcjell albinfo.ch.

Në mesin e gjashtë vendeve gjendet edhe Prizreni dhe Himara e Shqipërisë. Prizreni cilësohet nga “Vogue”, si qendra e kreativitetit të Kosovës, e vendosur në afërsi të Maleve të Sharrit.

“Prizreni është i pasur me arkitekturën bizantine dhe osmane. Vizitojeni gjatë muajit gusht kur qyteti mirëpret DokuFestin, festivali më i madh i filmit në Kosovë, që ka muzikë, ekspozitë të fotografive dhe shfaqjen e më shumë se 200 filmave”, është përshkrimi i “Vogue”.

“Vogue” këshillon turistët që të blejnë aksesorë filigrani në Prizren dhe të shijojnë qebapët e këtij qyteti. Në listën e gjashtë vendeve të Ballkanit është përfshirë edhe Himara në Shqipëri.

“Në rivierën shqiptare, ju pret qyteti i përgjumur i Himarës. I shtirë buzë detit Jon, ju keni mundësi që të vizitoni plazhet e Gjipesë dhe Gramës. Ky qytet ofron peizazh të jashtëzakonshëm me të cilin nuk ngopeni kurrë. Aty mund të vizitoni parkun e Llogarasë, ku mund të ecni në këmbë dhe të shijoni natyrën”, shkruan “Vogue” për Himarën.

Në listë të Vogues janë edhe Ohri, Beogradi, Transilvania e Rumanisë dhe rajoni i Hercegovinës në Bosnje e Hercegovinë.