Vjosa Osmani i bashkëngjitet protestës së LVV-së

Deputetja e Lidhjes Demokratike të Kosovës, Vjosa Osmani ka vendosur që ti bashkangjitet protestës së thirrur nga Lëvizja Vetëvendosje.

Ishte vetë deputetja Osmani e cila me anë të një postimi në llogarinë e saj në “Facebook”, ka njoftuar se do të marrë pjesë në protestë.

“Sot, nesër dhe çdo ditë tjetër PROTESTOJ kundër ndarjes dhe zhbërjes së shtetit të Kosovës”, ka filluar Osmani postimin.

Ajo ka dhënë edhe disa arsye se përse do të protestoj.

“Sepse tendenca për ndarje dhe për ndryshim kufijsh e rrezikon vetë qenësinë e shtetit të Kosovës, dhe kur rrezikohet të zhbëhet shteti, e kemi detyrim qytetar t’i themi JO. Sepse shpërblimi i Serbisë me tokë të Kosovës, kur asnjë lider serb nuk ka kërkuar falje për mijëra të vrarë, përfshirë shumë fëmijë, shumë të zhdukur, qindra mijëra shtëpi të shkatërruara e mbi 1 dekadë të regjimit represiv serb, nuk duhet të pranohet. Sepse kur shteti është në rrezik, nuk duhet të kenë më rëndësi ideologjitë, partitë apo dallimet e tjera. Të gjithë e kemi vetem një atdhe.  Sepse po heshtëm tani, viktimat e luftës dhe të pasluftës në veriun e vendit nuk do të jenë të qetë në varret e tyre – sepse ata u vranë në tokat që sot disa po i quajnë ‘dhuratë nga Rankovici’; Sepse po heshtëm tani, do të vdesë shpresa e çdo qytetari të veriut i cili është refugjat në vendin e tij; Sepse për të qenë shtet, Kosovës nuk i duhet vula e Serbisë; sepse shteti ynë ka vulën e Gjykatës Ndërkombëtare të Drejtësisë; por mbi të gjitha, shtetësia jonë është vulosur nga sakrifica shumë-vjeqare e popullit tonë; Sepse për Presidentin dhe bashkëbiseduesit e tij është në pyetje vetëm kariera e tyre politike, por për ne është në pyetje e ardhmja e fëmijëve tanë”, ka shkruar Osmani.

Ajo ka përfunduar postimin se do të protestoj jo vetëm sot por çdo ditë nëse është nevoja.

 

---