Vjenë: Rozeta Hajdari dhe ministrja Federale, Margarete Schramböck, patën takim të përbashkët

Mësohet se më 10.11.2021 një delegacion i udhëhequr nga ministrja e Industrisë, Ndërmarrësisë dhe Tregtisë, znj. Rozeta Hajdari, zhvilloi në Vjenë një takim bilateral me ministren Federale për çështje të Digjitalizimit dhe Ekonomisë të Austrisë, znj. Margarete Schramböck, transmeton albinfo.at.

Pjesë e delegacionit nga Kosova ishte po ashtu edhe zëvendësministri i Ekonomisë, z. Mentor Arifaj.

Diskutimet u fokusuan kryesisht në zgjerimin e bashkëpunimit mes dy shteteve, duke përfshirë lehtësimin e investimeve të huaja dhe ofrimit të mundësive për kapacitetet prodhuese të kompanisë austriake, Nearshoring, si dhe bashkëpunimin në fushën e transformimit digjital. Po ashtu mes palëve u dakordua mbi realizimin e një vizite të kompanive austriake në Kosovë në pranverë të vitit 2022.

Ministrja Hajdari dhe delegacioni po ashtu zhvilluan takime me zv. kryetarin e Odës Ekonomike WKO, z. Philipp Gady, ku ishin pjesë në punimet e projektit Access, të financuar nga Austrian Development Cooperation dhe Ministria e Industrisë, Ndërmarrësisë dhe Tregtisë të Republikës së Kosovës, implementuar nga Eciks si dhe takime të tjera me Vienna Economic Forum.

Ambasadori Pllana ftoi kompanitë që ishin pjesë e projektit për një takim të përbashkët me kompanitë nga diaspora/ Rrjetit të bizneseve që veprojnë në Austri, në Ambasadën e Kosovës në Vjenë.