Vjena mblodhi kryesinë e Rrjetit Global të Bizneseve të Diasporës Shqiptare

Presidenti Nazar Mehmeti, sekretari Ismet Smajli dhe drejtori për investime në Ministrinë e Diasporës Naim Dedushaj, u pritën nga kryesia dhe anëtarët e Rrjetit të Bizneseve Shqiptarë në Austri.

Kryesia e Rrjetit Global të Bizneseve të Diasporës Shqiptare është duke zhvilluar një vizitë disa ditore nëpër qendrat e rrjetit, në disa qytete evropiane.

Takimi i parë u mbajtë dje në Rrjetin e Bizneseve Shqiptare në Vjenë –  Austri.

Presidenti Nazar Mehmeti, sekretari Ismet Smajli dhe  Naim Dedushaj përfaqësues i Rrjetit në Kosovë, u pritën nga kryesia dhe anëtarët e Rrjetit të Bizneseve Shqiptarë në Austri.

Yll Blakaj, kryetar i degës së Austrisë dhe Evropës, informoj kryesinë e Rrjetit Global për punën e degës së Austrisë.

“Viti 2018 ka sjellë rezultate të shumta.  Rrjeti ka themeluar dy degët e tij në dy rajone tjera të Austrisë, ku ekszistojnë shumë biznese të suksesshme me pronarë  shqiptarë.

Duke qenë se koha është gjëja më së paku që po e posedojmë, dhe fizikisht po është e vështirë të jemi të lidhur nga hapësira të ndryshme gjeografike, krijimi i degëve po e lehtëson punën e përbashkët” ka njoftuar Blakaj.

Nazar Mehmeti, president i Rjetit Global ka thënë që bashkimi i biznesmenëve shqiptarë nën  ombrellën e rrjetit tashmë po tregon rezultate. Ai ka theksuar se përveç bashkëpunimeve mes vete të bizneseve shqiptare në botë, qëllimi kryesor mbetet investimi në Kosovë përmes hapjes së vendeve të punës në mënyrë që të rinjtë tanë të mos e lëshojnë vendin.

“Një gjë e tillë momentalisht po synohet të bëhet përmes platformës online “Finger Market” një platformë e re, e cila do të ndihmojë bizneset shqiptare kudo që janë që  të shkëmbejnë punë mes vete, të marrin shërbime dhe bashkë të investojnë në trevat tona”, ka thënë Mehmeti.

Pas takimit në Vjenë, kryesia e RRGBDSh-së në ditët në vijim, do të vizitojnë qendrat e Rrjeteve të Bizneseve në Berlin, Frankfurt, Paris, Cyrih dhe Londër.