Vizat nuk varen nga heqja e taksës

Ministrja e Integrimit Evropiane, Dhurata Hoxha, ka komentuar deklaratat e presidentit të Kosovës, Hashim Thaçi, ku së fundi tha se vendimi për taksën ndaj mallrave serbe ndërlidhet me çështjen e liberalizimit të vizave.

Hoxha për Klan Kosovën ka thënë se nuk ka informacione zyrtare që Bashkimi Evropian ka ndërlidhur taksën me liberalizimin e vizave, ndonëse ka kërkesë të zëshme për pezullimin e saj, njofton Klan Kosova.

“Nuk kemi informacione zyrtare se çështja e pezullimit të taksës është e ndërlidhur me liberalizimin e vizave për kosovarët”, është shprehur Hoxha, përcjell albinfo.ch.

“Edhe në takimet që kisha në Poloni lidhur me procesin e Berlinit, në takimin e Ministrave të Ballkanit Perëndimor ka qenë një kërkesë në vazhdimësi që Kosova të suspendojë taksën, por nuk është komunikuar në mënyrë të drejtpërdrejtë”.

“…por kjo është bërë një kërkesë e zëshme sidomos nga SHBA-ja”, ka shtuar tutje ajo.

“Rrethanat së paku jo para përfundimit të zgjedhjeve s’do të mund të arrijmë të tregojmë se çka po ndodh. Ne po synojmë liberalizimin, sepse kemi kërkesa të vazhdueshme që sa më shpejt vendimi për votimin në Këshillin e Ministrave të futet në agjendë”, shtoi tutje Dhurata Hoxha.