Viti i ri shkollor fillon me greva në Kosovë

Kryetari i Sindikatës së Bashkuar për Arsim, Shkencë dhe Kulturë (SBASHK), Rrahman Jasharaj, në një deklaratë dhënë Telegrafit ka thënë se arsyeja e grevës kësaj radhe do të jetë mbyllja e shkollave në komunën e Kamenicës, gjë të cilën e ka deklaruar kryetari i kësaj komune, Qëndron Kastrati

Kryetari i Sindikatës së Bashkuar për Arsim, Shkencë dhe Kulturë (SBASHK), Rrahman Jasharaj, në një deklaratë dhënë Telegrafit ka thënë se arsyeja e grevës kësaj radhe do të jetë mbyllja e shkollave në komunën e Kamenicës, gjë të cilën e ka deklaruar kryetari i kësaj komune, Qëndron Kastrati.

“Problemi që e ka ngritur pa arsye kryetari Qëndron Kastrati në komunën e Kamenicës që në emër të reformave për mbylljen e shkollave, dhe ne jemi kundër mbylljes së shkollave, sepse nuk është zgjidhje kjo. Nëse kryetari nuk tërhiqet nga vendimi, Kamenica do të fillojë me greva, dhe për këtë besoj që edhe komunat e tjera pastaj do të solidarizohen me kolegët e tyre në Kamenicë”, ka thënë Jasharaj.

Sipas tij, fillimisht greva do të fillojë në Kamenicë, e më pas mund të përshkallëzohet edhe në nivel vendi.

“Pra, nëse ndodh kështu në Kamenicë, në shtator do të ketë greva. Fillimisht grevë do të ketë në Kamenicë për këtë shkak. Por, do të përshkallëzohet në shenjë solidaritet me kolegët në Kamenicë, edhe në komunat e tjera mund të ketë greva, qofshin ato me orë ose do të ketë grevë edhe në nivel vendi”, është shprehur ai.

Ndër të tjera Jasharaj ka thënë se Kamenica do të duhej të planifikonte me kohë çështjen e shkollave, përcjell Albinfo.ch.

---