Viola von Cramon: BE-ja të sigurojë vaksina për Kosovën

photo/wikipedia

Raportuesja për Kosovën në Parlamentit Europian, Viola von Cramon-Taubadel, ka kërkuar nga Bashkimi Europian që të furnizojë Kosovën me vaksina kundër COVID-19 sa më shpejt që është e mundur.

“Një problem shumë aktual është gjithashtu mungesa e furnizimit me vaksina në Kosovë. Kapacitetet e prodhimit këtu në Bashkim Europian janë aktualisht duke u rritur dhe kjo duhet të dërgojë në një furnizim shumë më të mirë për Kosovën sa më shpejt që është e mundur. BE-ja duhet ta mbështesë vaksinimin e shpejtë të personelit shëndetësor dhe grupeve të tjera më të rrezikuara nga COVID-19 në Kosovë”.

Ajo këto komente i ka bërë në mbledhjen e Parlamentit Europian për Raportin e Progresit për Kosovën dhe vendet e tjera të rajonit, raportojnë mediat vendore, transmeton Albinfo.ch.

Raportuesja për Kosovën në PE e ka uruar kryeministrin Albin Kurti dhe qeverinë e re të Kosovës, duke thënë se iu uron shumë suksese për sfidat që i presin dhe pret që të punojnë për prioritetet e përbashkëta.