Vetëvendosje bojkoton vazhdimin e seancës për çmimin e naftës

Pas rikthimit nga pauza të seancës së jashtëzakonshme të Kuvendit të Kosovës për çmimin e naftës, Lëvizja Vetëvendosje nuk është paraqitur në seancë.

Në sallë ka munguar edhe kryeministri Albin Kurti, dhe të gjithë ministrat dhe deputetët e subjektit më të madh politik në vend.

Deputetja e Partisë Demokratike të Kosovës, Vlora Çitaku, pati kritika për bojkotimin e vazhdimit të seancës nga VV-ja, pasi deklaroi se për një çështje kaq të rëndësishme për qytetarët, pushteti ka zgjedhur ta bojkotojë seancën, transmeton albinfo.ch.

Ndryshe, Lidhja Demokratike e Kosovës përmes një rezolute, po kërkon uljen e përkohshme të akcizës për naftën nga 36 centë për litër në 20 centë deri në stabilizimin e çmimeve, uljen e TVSH-së për karburantet nga 18 për qind në 8 për qind, si dhe subvencionimin e çmimeve të naftës për sektorët më të ndjeshëm të ekonomisë: bujqësinë, transportin publik dhe prodhuesit vendorë.