Vetëvendosja e quan tradhti marrëveshjen për demarkacionin

Lëvizja Vetëvendosje thotë se edhe marrëveshja e re për Demarkacionin, që të mërkurën hidhet për votim në Kuvend, ia humb Kosovës 8.200 hektarë, prandaj ajo si e tillë është krim e tradhti për vendin.

Në Vetëvendosje thonë se Ramush Haradinaj me këtë ia vë vetes vulën e tradhtarit dhe se po manipulohet nga PDK-ja e LDK-ja, për shkak të ambicieve të tij për pushtet, përcjell albinfo.ch.

“Kështu nuk shkruhen e nuk bëhen ligjet. Ky pazar fjalësh na i humbet 8,200 hektarë njësoj. Ky Projektligj ishte i padrejtë dhe i dëmshëm e tani bëhet edhe më i keq pas këtyre akrobacioneve; ai është krim dhe tradhti që duhet kundërshtuar e nuk duhet legjitimuar. Brenda vitit AAK-ja ndryshoi qëndrim për demarkacionin. Brenda ditës ndryshoi qëndrim për Komisionin Bulliqi. Nuk ka gjë më të keqe se sa kthimi në opozitë pas një qeverisjeje të dështuar. Kush mund të bashkëpunojë më me ty, nëse ia vendos vetes vulën e tradhtarit?”, thuhet në reagimin e kësaj partie.

Lëvizja Vetëvendosje thotë se nuk do ta votojë këtë Projektligj të dëmshëm dhe se do ta kundërshtojë atë.