Veteranët e UÇK-së protestojnë pas përjashtimit nga Ligji për pagën minimale

Veteranët e Ushtrisë Çlirimtare të Kosovës janë duke protestuar para Kuvendit, ku po kundërshtojnë për përjashtimin e kësaj kategorie nga Projektligji për Pagën Minimale.

Protesta e veteranëve të UÇK-së, e nisur sot nga ora 9:30, është  ende duke vazhduar.

Momentalisht protesta është e qetë dhe nuk raportohet për ndonjë incident, shkruan Albinfo.ch.

Veteranët në fillim të protestës kanë kaluar rrethojën e Kuvendit, për të vazhduar protestën brenda oborrit.

Ata po kërkojnë që Qeveria të tërheqë Projektligjin për pagën minimale, ndërsa kanë thënë se nuk do të lëvizin nga qëndrimet e tyre deri në reflektim të Qeverisë.

U.d. kryetari i Organizatës së Veteranëve të Luftës së UÇK-së, Faton Klinaku, ka folur para protestuesve.

Ai u ka bërë thirrje atyre që të mos e provokojnë situatën, teksa shtoi se me miratimin e Ligjit për pagën minimale, deputetët vepruan kundërligjshëm.

Tutje, ai ka folur edhe për kryeministrin e Kosovës, Albin Kurti, duke e quajtur si “kokëfortë”, duke thënë se “mendon se do të na shtrijë për tokë”.

“Edhe pse ka kohë që kemi paralajmëruar se do ta kundërshtojmë këtë, kryeneçësia e këtij kryeministri që është dashur ta presim një muaj, e për takimin e dytë pritëm 8 muaj takim që mbeti në gjysmë, na detyroi të jemi këtu. Ai mendon se duke mos bashkëpunuar me ne si dhe me sindikatat, mendon se do të na shtrij për toke”, tha Klinaku./Albinfo.ch

 

---