Vështirësohet natyralizimi i të huajve në Bazel

Ndryshimet në procedurën e natyralizimit kanë ardhur si rezultat i iniciativës SVP-së kantonale për gjuhën

Në kantonin e Bazelit (Basel-Stadt) janë ashpërsuar kriteret për natyralizimin e të huajve. Ata që dëshirojnë të marrin pasaportën zvicerane tash e tutje duhet të tregojnë njohuri më të mira të gjuhës gjermane. Por ndyshimet e reja parashohin edhe një lehtësim: shkurtohet koha pas të cilës të huajt kanë të drejtë të kërkojnë shtetësinë.

Autoriteti për natyralizimin e të huajve ka përpiluar një test të vetin në të cilin kërkohet njohja e gjermanishtes në një nivel të caktuar evropian reference. Testi do të zgjasë një orë, me ç`rast i huaji duhet të kalojë me sukses 60 për qind të vëllimit, me shkrim dhe me gojë.

Kurset e gjuhës duhet të ndiqen te ofertuesit privatë ndërsa paraqitje në provimin për shtetësi mund të përsëritet në mënyrë të pakufizuar.

Këto ndryshime në procedurën e natyralizimit kanë ardhur si rezultat i pranimit të kundërpropozimit për iniciativën e SVP-së kantonale për gjuhën.