Vërshime në Kosovë, Peja më e rrezikuara

Rrugët në Pejë janë të mbushura me ujë, sikur të ishin në ndonjë zonë moçalike. Më kritike përshkruhen sheshi kryesor i Pejës, lagjja Dardania dhe lagjja Fidanishte

Reshjet e pandërprera të shiut kanë shkaktuar vërshime të mëdha në disa zona të Kosovës, ndërsa qyteti i Pejës është më i rrezikuari. Rrugët në këtë qytet janë të mbushura me ujë, sikur të ishin në ndonjë qytet moçalik. Më kritike përshkruhen sheshi kryesor i Pejës, lagjja Dardania dhe lagjja Fidanishte.

Kjo ka bërë që kryetari i Pejës Gazmend Muhaxhiri të krijoj shtabin emergjent për gjendje të jashtëzakonshme.

Zëdhënësi i këtij shtabi Engelbert Zefaj, tha për KP se vërshimet janë krijuar si pasojë e infrastrukturës aktuale e cila nuk ka kapacitete për ta përballuar.

“Këto janë pikat më kritike dhe ka përmbysje edhe në lagjet tjera por janë më të vogla. Kryetari ka themeluar shtabin emergjent për këtë gjendje të jashtëzakonshme dhe i kemi mobilizuar gjitha forcat njerëzore dhje mjetet motorike. Të gjitha shkollat me kërkesën e shtabit emergjent janë mbyllur”, ka thënë Zefaj.

Ai, ka bërë me dije se kanë lajmëruar edhe Forcat e Sigurisë së Kosovës dhe po presin që të njëjtit t’u dalin në ndihmë shumë shpejt. Zefaj ka bërë me dije se nuk ka pasoja në njerëz dhe deri më tani për dëmet tjera nuk kanë bërë ndonjë bilanc.

Sipas njoftimeve zyrtare, vërshime ka edhe në disa zona të Kosovës, në Prizren, Skenderaj, Drenas, Lypjan. Komuna e Prishtinës, ndërkaq është në gjendje gatishmërie me ekipet e veta dhe për çdo problem​ ​​do të jetë në gjendje t’u dalë në ndihmë qytetarëve.

Në anën tjetër, Instituti Hidrometeorologjik i Kosovës dhe Agjencia për Mbrojtjen e Mjedisit të Republikës së Kosovës kanë paralajmëruar reshje të mëdha shiu për sot, e hënë, 7 mars 2016. Këto reshje do ta arrijnë maksimumin në ora 18:00.