Vendi që synon të rrisë përdorimin publik të inteligjencës artificiale deri në 80%

Keystone EPA/MARK R. CRISTINO

Qeveria japoneze ka përgatitur një draft–plan të ri për zhvillimin dhe përdorimin e inteligjencës artificiale (IA), ku parashikohet që fillimisht teknologjia të adoptohet nga gjysma e popullsisë dhe më pas të arrihet një përfshirje prej 80%.

Sipas informacioneve të siguruara nga Jiji Press, dokumenti nënvizon se rritja e përdorimit të IA-së është thelbësore për forcimin e kapaciteteve teknologjike të vendit. Plani përfshin gjithashtu objektivin për të tërhequr rreth 1 trilion jen nga sektori privat për të mbështetur kërkimin dhe zhvillimin. Qeveria pritet ta miratojë këtë program deri në fund të vitit.

Aktualisht, SHBA-ja dhe Kina kryesojnë globalisht në përdorimin e IA-së gjenerative, me norma përkatësisht 68,8% dhe 81,2%, shumë më të larta se përdorimi në Japoni, i cili qëndron në vetëm 26,7%.

Drafti thekson se inteligjenca artificiale duhet të shtrihet në të gjitha segmentet e shoqërisë dhe të funksionojë si një infrastrukturë thelbësore, e konsideruar si “bazë intelektuale dhe platformë ekzekutimi” për zhvillimin e ardhshëm të vendit.