Vendi ku kyçja në Twitter pason me gjobë prej 8874 dollarësh

Pixabay

Gjykata e Lartë e Brazilit ka njoftuar se përdoruesit e Twitter do të gjobiten deri në 8,874 dollarë në ditë nëse përdorin një VPN për të hyrë në aplikacion.

Brazili është vendi i fundit që ka ndaluar Twitter-in. Ndalimi hyri në fuqi më 31 gusht, pasi Elon Musk refuzoi të caktojë një përfaqësues ligjor për shkak të një mosmarrëveshjeje të vazhdueshme me qeverinë braziliane.

Gjykatësi brazilian, Alexander de Moraes, akuzoi se platforma e Musk po përdorej për të përhapur lajme të rreme shpifëse dhe ndalimi do të qëndrojë në fuqi derisa pronari i Twitter të pajtohet.

Tani banorët e Brazilit do të ndalohen të përdorin këtë rrjet social – ose do të përballen me gjoba të mëdha nëse kapen duke përdorur një VPN për të kapërcyer ndalimin.

“Ne nuk mund të jetojmë në një shoqëri ku miliarderët që jetojnë jashtë kanë kontroll mbi mediat sociale dhe janë në gjendje të shkelin sundimin e ligjit, të mos u binden urdhrave të gjykatës dhe të kërcënojnë autoritetet tona”, tha Prokurori i Përgjithshëm brazilian, Jorge Messiah.

Drejtori i Përgjithshëm i Tesla-s ka nisur një tirade kundër qeverisë braziliane, duke bërë thirrje për t’i dhënë fund “regjimit represiv”.

Në një moment, Musk ri-tweetoi postimin, duke vënë në dukje se gjobat e mundshme për qytetarët që përdorin X në Brazil janë 528 për qind më të larta se të ardhurat e tyre mujore.

– Regjimi shtypës në Brazil ka aq frikë nga njerëzit që të zbulojnë të vërtetën, saqë kushdo që përpiqet, do të falimentojë, tha Musk.

Për momentin, mbetet e paqartë se si Gjykata e Lartë e Brazilit synon të zbulojë se kush përdor një VPN për të hyrë në Twitter dhe se si do të zbatohen ato dënime.