Dalin emrat e viktimave të aksidentit në Prishtinë

Shkak i aksidentit ka qenë shpejtësia e madhe, derisa vetura ishte me targa të Gjermanisë

Një aksident i rëndë ka ndodhur të enjten pas mesnatës në hyrje të Prishtinës, ku një veturë e tipit “Audi” ka rënë nga ura, ku kanë mbetur të vdekur katër persona, dy burra dhe dy gra, raporton albinfo.ch. Mësohet se janë nga Komuna e Vitisë.

Siç bëjnë të ditura mediat vendase, shkak i aksidentit ka qenë shpejtësia e madhe, derisa vetura ishte me targa të Gjermanisë.

Gjithashtu një i ri që po ashtu ishte në veturë është dërguar në QKUK, dhe mësohet se gjendja e tij nuk është stabile. Bëhet fjalë për një djalë 17 vjeçar që është në gjendje të rëndë shëndetësore, si pasojë e aksidentit. “Gjendja e të lënduarit ende është kritike. Pacienti me inicialet Q.A i lindur në vitin 2000 është pranuar në orën 3:00 të mëngjes me lëndime të rënda sidomos lëndimet janë të shprehura në pjesën e gjoksit dhe disa brinjë. Gjendja e pacientit është e rëndë por është në kontroll, është duke fjetur me barna dhe pritet në vazhdim evaluimi i mëtutjeshëm”, ka thënë për mediat e Prishtinës, mjeku Rexhep Gjyliqi nga Klinika Intensive në QKUK.

Vetura ishte shkatërruar tërësisht, derisa policia dhe ambulanca kanë arritur menjëherë në vendin e ngjarjes.

Policia më pas ka dhënë emrat e viktimave:

Si pasojë e këtij aksidenti në vendin e ngjarjes kanë ndërruar jetë:

– E. Alidemaj 53 vjeç, mashkull, shtetas Gjerman,

– E. Alidemaj 50 vjeç, mashkull, shtetas Kosovar,

– G. Alidemaj 53 vjeçe, femër, shtetase Gjermane,

ndërkaq pasi është dërguar në QKUK, ka ndërruar jetë:

– N. Alidemaj 47 vjeçe, femër, shtetase Kosovare.

Nga ky aksident lëndime të rënda trupore ka marrë:

• Q. Alidemaj 17 vjeç, mashkull, shtetas Kosovar, i cili aktualisht është duke u trajtuar në QKUK – Prishtinë.

 

---