Vdesin dy persona si pasojë e gripit në Kosovë

Dy persona kanë vdekur si pasojë e prekjes nga gripi Influenca A, ka njoftuar Instituti Kombëtar i Shëndetësisë Publike. Pacientët kanë qenë të shtrirë në Klinikën Infektive. “Pacientet kanë pasur sëmundje kronike të sistemit kardiovaskular dhe respirator dhe nuk kanë qenë të vaksinuar me vaksinën e gripit sezonal”, thotë IKSHP-ja në njoftimin për media. 

Sipas IKSHP-së, nga 1 tetori 2018 deri sot janë raportuar gjithsej 18 mijë e 736 raste të dyshimta me grip, 3 mijë e  233 raste me infeksione respiratore akute dhe 19 raste me infeksione të rënda respiratore akute, përcjell albinfo.ch.

Instituti ka rekomanduar qytetarët të kenë kujdes dhe të mos dalin gjatë në ambiente të ftohta, të mos qëndrojnë në lokale të mbyllura me dendësi të madhe të njerëzve, dhe të përdorim sa më shumë lëngje të nxehta dhe vitamina.