Vdes një i burgosur në spitalin e Pejës

Trupi i pajetë është dërguar për autopsi, ndonëse familja ka kërkuar që të mos bëhet autopsia, por Shërbimi Shëndetësor i Burgjeve ka kërkuar që të respektohet ligji dhe të bëhet autopsia

Këshilli për Mbrojtjen e të Drejtave të Njeriut (KMDLNj) ka njoftuar se në Spitalin Rajonal të Pejës, rreth orës 01:25 e martë (në mëngjes) ka ndërruar jetë i burgosuri H.G. i lindur me 06.07.1943, përcjell albinfo.ch.

Mësohet se i burgosuri H.G. ka qenë i sëmurë rëndë dhe tërë kohën ka qëndruar në stacionarin e Burgut të Dubravës, kurse ka qëndruar edhe në Spitalin Rajonal në Pejë dhe QKUK në Prishtinë.

Sipas Këshillit për Mbrojtjen e të Drejtave të Njeriut për një kohë ka pasur ndërprerje të vuajtjes së dënimit pas së cilës është kthyer në burgun e Dubravës.

I burgosuri ishte dërguar në Spitalin Rajonal në Pejë më 29.08.2017. Gjatë qëndrimit në Spital në Pejë pranë tij kanë qenë anëtarët e familjes dhe i është ofruar trajtim shëndetësor mirëpo, nuk është evituar vdekja. Gjithashtu, duhet të theksohet se ka qenë në procedurë edhe një ndërprerje e vuajtjes së dënimit, por se vdekja e të burgosurit H.G. nuk ka mundur të evitohet.

Trupi i pajetë është dërguar për autopsi, ndonëse familja ka kërkuar që të mos bëhet autopsia, por Shërbimi Shëndetësor i Burgjeve ka kërkuar që të respektohet ligji dhe të bëhet autopsia.