Vazhdon integrimi i ish-pjesëtarëve të MUP-it

Grupi i dytë, me 63 ish- pjesëtarë të MUP-it serb, kanë nënshkruar kontratat e punës për t’u transformuar në Policinë e Kosovës. Në janar ata nisin trajnimin

Procesi i integrimit të ish- pjesëtareve të MUP-it (Ministrisë Serbe të Punëve të Brendshme) në Policinë e Kosovës, i cili kishte filluar zyrtarisht me 13 dhjetor është duke vazhduar ashtu siç është paraparë me marrëveshjen Thaçi-Daçiq që është arritur në Bruksel.

Dy ditë parë, siç njofton Policia e Kosovës, janë nënshkruar kontratat e punës edhe të 63 zyrtarëve policor si dhe janë nënshkruar Deklaratat e betimit në përputhje me parimet dhe procedurat e Policisë së Kosovës.

“Nënshkrimit të kontratave të punës iu ka paraprirë procesi i verifikimit të identitetit të tyre nga ana e Agjencisë së Regjistrimit Civil të Ministrisë së Punëve të Brendshme dhe verifikimit të së kaluarës së tyre nga ana e Policisë së Kosovës dhe misionit EULEX:, thuhet në njoftimin e policisë.

Pas nënshkrimit të kontratave të punës, pritet të vazhdohet me procedura të trajnimit, ku zyrtarët e rinj të Policisë së Kosovës në janar të 2014 do të fillojnë trajnimin në Akademinë e Kosovës për Siguri Publike në Vushtrri për t’u pajisur me njohuri lidhur me legjislacionin e Republikës së Kosovës.

“Procesi i integrimit të pjesëtarëve tjerë pritet të vazhdoj sipas dinamikës së paraparë, në përputhje me procedurat të rekrutimit dhe kornizën ligjore të Policisë së Kosovës”, thuhet në njoftimin e policisë.

Siç është raportuar në media, janë më shumë se 300 pjesëtarë që i përkasin MUP-it serb, që pretendojnë të transformohen në Polici të Kosovës. “Konvertimi” është pritur me shqetësime të mëdha sidomos të popullsia shqiptare e cila ka rezerva në ish policinë e Serbisë.

Grupi prej 63 pjesëtarëve është i dytë që nisë integrimin në Polici. Herën e parë kanë qenë 17 polic, ish pjesëtarë të MUP-it, të cilët e kanë përfunduar trajnimin dyjavor në Vushtrri, në Shkollën e Policisë së Kosovës.