Vazhdon importi i veturave të vjetra

Sipas të dhënave doganore, vetëm brenda shtatë muajve të këtij viti, në Kosovë kanë hyrë më shumë se 9000 vetura, që u kanë sjellë doganave rreth 19 milionë euro

Mijëra vetura të vjetra hyjnë për çdo vit në Kosovë duke ndikuar dukshëm në rritjen e buxhetit të vendit. Sipas të dhënave doganore, vetëm brenda shtatë muajve të këtij viti në Kosovë kanë hyrë më shumëse se 9000 vetura, me një shumë rreth 19 milionë euro.

Po ashtu sipas doganës kosovare, niveli i importit të veturave të vjetra vazhdon të mbetet i njëjtë me vitin e kaluar.

“Vitin e kaluar Buxheti i vendit ka përfituar mbi 41 milionë euro për më shumë se 20 mijë vetura të vjetra, kurse për 1175 vetura të reja janë arritur të mblidhen të hyra rreth 4.6 milionë euro”, raporton Dogana e Kosovës, transmeton KTV.

Sipas të njëjtit njoftim, deri në muajin korrik, në Kosovë janë importuar 9.202 vetura që kanë arritur shumën e më se 19 milionë eurove, përderisa për të rejat është arritur të mblidhen 2.4 milionë euro.

Derisa ky import ka anën pozitive sepse ndikon në rritjet buxhetore, prapa ka edhe anën tjetër të medaljes.  

Numri jashtëzakonisht i madh i veturave ka ngufatur qytetet, që për pasojë ka shkaktuar shumë probleme në ambient, sepse shumica e veturave janë Euro2 ose Euro3, që lëshojnë sasi të madhe të dyoksidit të karbonit.

Kjo situatë vetëm se e ka rënduar edhe më shumë nivelin e ndotjes në Kosovë.

Sipas të dhënëve të Ministrisë së Brendshme, në Kosovë janë të regjistruara 272 mijë e 900 automjete të ndryshme. Nëse kjo shifër konvertohet me numrin e banorëve rezidentë del se çdo i gjashti banor e ka një veturë.