UNICEF ndihmon ri-integrimin e kosovarëve

Përfaqësuesit e UNICEF-it kanë shprehur gatishmëri për ta mbështetur procesin e ri-integrimit të personave të riatdhesuar në Kosovë

Përfaqësuesit e Fondit Emergjent të Kombeve të Bashkuara për Fëmijët (UNICEF) kanë shprehur gatishmëri për ta mbështetur procesin e ri-integrimit të personave të riatdhesuar në Kosovë. Ky proces është konsideruar më i rëndësishëm për përfaqësuesit e institucioneve të Kosovës.

Këtë gatishmëri për të mbështetur ri-integrimin e ka potencuar James Mugaju, zëvendësshefi i UNICEF-it në Kosovë.

Ai tha se UNICEF është i gatshëm të mbështesin dhe të vazhdojnë bashkëpunimin lidhur me procesin e ri-integrimit, ndërsa propozoi organizimin e një takimi të nivelit të lartë për riatdhesim, ku do të marrin pjesë organizata të ndryshme vendore dhe ndërkombëtare të cilat do ta ndihmonin këtë proces.

Këto komente James Mugaju i bërë gjatë një takimi që zhvilloi me zëvendësministrin e Punëve të Brendshme, Izmi Zeka.

Ky i fundit falënderoi përfaqësuesit e UNICEF-it, për ndihmën e vazhdueshme që ka dhënë Kosovës lidhur me procesin e ri-integrimit personave të riatdhesuar. Ai theksoi se ri-integrimi është një proces i vazhdueshëm dhe me prioritet nga Qeveria e Republikës së Kosovës.

“MPB ka të gjitha resurset për funksionalitetin dhe akomodimin e gjithë të riatdhesuarve. Kemi mekanizmat institucionale që kanë bërë që ri-integrimi i personave të riatdhesuar të jetë i një standardi evropian, krahasuar me kushtet që janë në Kosovë”, deklaroi Zeka.

Ndryshe, njëri nga kushtet për liberalizimin e vizave dhe afrimit të Kosovës me BE-në, është kthimi i kosovarëve që jetojnë pa leje qëndrimi në Shtetet e Bashkimit Evropian dhe ri-integrimi i tyre në shoqëri.

 Pavarësisht ndjeshmërisë së procesit dhe implikimeve buxhetore, Qeveria e Kosovës është e përkushtuar që këtë proces të çoj deri në fund, për faktin se ky është njëri nga kushtet për marrjen e udhërrëfyesit për liberalizimin e vizave.